මම චීනේ මුදල් ඇමති නෙවෙයි – රවී

තමන් ශ්‍රී ලංකාවේ මුදල් ඇමති මිස චීනයේ මුදල් ඇමති නොවන බවත්, චීනයෙන් ශ්‍රී ලංකාව සියයට 2ට වඩා පොලියකට ණය නොගත් බව කියන්නේ නම්, එරටින් මේ වනවිට ලබාගෙන ඇති ණයවලට සියයට 2ක බැගින් පොලී ගෙවීමට සුදානම් බවත්,  මුදල් අමාත්‍ය රවි කරුණානායක මහතා  අද පැවසීය.

චීන තානාපති යී ෂියැංලියන්ග් මහතා පසුගියදා එල්ල කළ විවේචනයකට ප්‍රතිචාර දක්වමින් මුදල් අමාත්‍යවරයා 03 මහනුවරදී මේ බව අවධාරණය කළේය.

චීනයේ ණය පිරිවැය ඉහළ බවට මුදල් අමාත්‍යවරයා කරන ලද ප්‍රකාශයක් විවේචනය කරමින් පසුගිය අඟහරුවාදා (01) චීන තානාපතිවරයා මාධ්‍ය හමුවක් අමතමින් කියා සිටියේ චීනයේ ණය පිරිවැය වැඩිනම් තවදුරටත් ණය ඉල්ලන්නේ මන්දැයි යනුවෙනි.

ඒ සම්බන්ධයෙන් මාධ්‍යවේදීන් මුදල් අමාතවරයාගෙන් කරුණු විමසුවේ ඔහු අද මහනුවර සංචාරයක යෙදී සිටියදීය.

චීන තානාපතිවරයාගේ චෝදනා ප්‍රතික්ෂේප කරන බව එහිදී මුදල් ඇමතිවරයා ප්‍රකාශ කළේය.

“පසුගියදා ශ්‍රී ලංකාවේ චීන තානාපතිවරයා කළ ප්‍රකාශයක් සම්බන්ධයෙන් මාධ්‍ය ඔස්සේ විවිධ අදහස් පළවෙනවා. මා ඉතාම පැහැදිලිව කියන්න කැමැතියි, චීනය අපේ ළඟම මිතුරකු වුණත් තානාපතිවරයාගේ ප්‍රකාශය සාවද්‍යයි. මා එය ප්‍රතික්ෂේප කරනවා. එතුමන්ලා කියනවා නම් සියයට 2ට වඩා ඉහළ පොලියකට ශ්‍රී ලංකාව ණය ගත්තෙ නෑ කියල, අපි දැන් අරගෙන තියෙන ණයවලට සියයට 2ක ගාණේ පොලී ගෙවන්න අපි ලෑස්තියි. අපේ රට ඉතා කුඩා එකක් වෙන්න පුළුවන්. නමුත් අපි ස්වෛරී රාජ්‍යයක්. මා චීනෙ මුදල් ඇමැති නෙවෙයි, මම ශ්‍රී ලංකාවේ මුදල් ඇමැති කියල ඉතා පැහැදිලිව කියන්න අවශ්‍යයි. චීනයට ඒ රටේ ආර්ථිකය ගොඩනැගීමට තියෙන අයිතිය වගේම අපේ රටේ ආර්ථිකය ගොඩනැගීමේ අයිතිය අපට තියෙනවා.”

Comments

comments