ගෝඨාගේ උපදෙසින් ආවා කල්ලිය හැදූ හැටි තමන් දැන සිටි බව රාජිත හෙළි කරයි

හිටපු ආරක්ෂක ලේකම් ගෝඨාභය රාජපක්ෂගේ  අනුදැනුම සහ උපදෙස් මත උතුර නොසන්සුන් කිරීම සදහා මහින්ද රාජපක්ෂ පාලන සමයේ ආවා කල්ලිය නිර්මාණය කරන ලද බව රජයේ මාධ්‍ය ප්‍රකාශකයා හෙළිදරව් කළේය.

මෙම දරුණු හෙළිදරව්ව කරමින් පසුගිය රජයේද ප්‍රබල අමාත්‍යධුරයක් දැරු දොස්තර රාජිත සේනාරත්න රජයේ ප්‍රවෘත්ති දෙපාර්තමේන්තුවේ කැබිනට් මණ්ඩල තීරණ දැනුම් දීම සදහා 2 බදාදා පැවති මාධ්‍ය හමුවේදී කියා සිටියේ යුද සමයේ එවැනි කල්ලියක් ගොඩනැගීමේ අවශ්‍යතාවක් තිබුනු වග තමන්ගේද පිළිගැනීම බවයි.

ආවා සංවිධානය පෝෂණය කළ හමුදා නායකයන් කවුරුන්දැයි තමන් නමින්ම දන්නා බවත් ඉන් ප්‍රධාන බ්‍රිගේඩියර්වරයකු තම මිත්‍රයකු බවත් කී අමාත්‍යවරයා එම නම හෙළි කිරීමෙන් වැළකී සිටියේය.

එම සංවිධානය මේ වන විටත් උතුර නොසන්සුන් කිරීමට කටයුතු කරන්නේ එය නිර්මාණය කිරීමට මුල්වු අයගේම අවශ්‍යතාවය මත  විය හැකි බවට ඔහු සැක පහල කළේය.

ආවා සංවිධානය පසුගිය එල්.ටී.ටී.ඊ සමයේ නිර්මාණය කරන ලද්දක් බවට අමාත්‍ය රාජිත සේනාරත්න පැවසුවද  මේ රජයේ අමාත්‍ය ධුරයක් දරන එවක යුද හමුදාපති සරත් ෆොන්සේකා ඒ පිලිබඳ තමන්ට අවබෝධයක් ඇති බවක් පල කළේ නැත.

එක්සත් ජාතික පක්ෂයේ  කැලණිය ආසන සංවිධායක ධුරය පිලිගැනීමෙන් පසු සිරිකොතදී  ගගන වෙත කියා සිටියේ ආවා සංවිධානය යනු හුදෙක් මැර කල්ලියක් පමණක් බවයි.

ද්‍රවිඩ ක්‍රියාකාරීන් මර්දනය කිරීම සදහා ‘අතීතයේ සිටම ක්‍රියාත්මක වූ’  ආවා සංවිධානය විසින් මාධ්‍යවේදීන්ට ද  පහර දුන් බව අමාත්‍ය රාජිත සේනාරත්න එහිදී සදහන් කළේය.

දෙමළ ඩයස්පෝරාව සමග ආවා කල්ලිය සම්බන්ධ බවට නැගෙන චෝදනා ඔහු තරයේ ප්‍රතික්ෂේප කළේය.

ගෝඨාභයට එරෙහිව පියවර ගැනීම 

ආවා කල්ලිය සමග හිටපු ආරක්ෂක ලේකම්වරයා ගේ සම්බන්ධතාව දන්නේ නම් ඒ සම්බන්ධයෙන් පියවර නොගන්නේ මන්දැයි විමසූ ගගන මාධ්‍යවේදියාට ඇමතිවරයා පිළිතුරු දුන්නේ “නෛතික වශයෙන් ඔප්පු කරන්න පුලුවන්නම් එකත් සිදුවෙයි,” යනුවෙනි.

පොලිස් වෙඩි පහරින් මරා දමන ලද යාපන සරසවි සිසුන් දෙදෙනා පැදගියේ දෙමළ ඩයස්පෝරා සහයෙන් ලැබුනු අධිබල යතුරු පැදි බවට ඇතැම් සිංහල ජාතිකවාදී මාධ්‍ය ඇතුළු කණ්ඩායම් වලින් නැගුනු චෝදනා ද ඔහු  බැහැර කළේය.

විජයරාජා සුලක්ෂන් සහ නඩරාසා ගජන් මරා දමනු ලැබුවේ 100 cc යතුරු පැදියක යමින් සිටියදීය.

යාපනයේ ජනතාව බියවද්දමින් කඩු ගෙන යතුරු පැදිවල සැරිසරන බව පැවසෙන ආවා නමින් හැඳින්වෙන කල්ලිය පිළිබඳව ආණ්ඩුවේ ප්‍රබල ඇමතිවරුන් අතරේ  ආවා සංවිධානය සම්බන්ධයෙන් මේ වන විටත් ප්‍රකාශයට පත්වෙමින් ඇත්තේ වෙනස් මතය.

රජය විසින් නඩත්තු කෙරෙන අතුරු හමුදා කල්ලි විසුරුවා හරින ලෙස එක්සත් ජාතීන්ගේ සංවිධානය ඇතුළු මානව හිමිකම් සංවිධාන දිගටම ඉල්ලීම් කර තිබේ.

 

රේඩියෝ ගගන

Comments

comments